اچیچی گل بات اک ایہو جیہی کتاب اے جیہدے وچ پنجابی زبان دے سرکڈھ تے نوجوان لکھاریاں دے انٹرویو اکٹھے کر کے شائع کیتے گئیے نیں ۔ایہہ اک بہت مشکل تے صبر آزما مرحلہ اے، جیس نوں عثمان پھلروان ورگا جی دار محقق تے نقاد ای بنے لا سکدا سی۔کسے لکھاری واسطے لکھنا کوئی اوکھا کم نہیں پر کسے دوجے لکھاری کولوں اوس دی اپنی ذات بارے پچھے گئے سوالاں دا جواب حاصل کرنا بڑا ای تکلیف دہ مسلہ بن جاندا اے۔ کسے بارے اک دو پیراگراف لکھنا دو منٹ دی گل اے پر اپنے بارے لکھنا دو گھنٹیاں وچ وی مشکل اے۔ جیویں میرا انٹرویو خیر نال 3 سالاں وچ مکمل ہویا اے۔ اینا زیادہ انتظار تے ذہنی کوفت دا اندازہ جناب عثمان پھلروان توں ودھ کوں لگا سکدا اے۔
عثمان پھلروان اپنے ادبی تے غیر ادبی رشتیاں دا بڑا خیال رکھدا اے۔ ایس دے ساویں ہمیشہ دوسرے سجن دی ذات یا اوس دے علمی تے ادبی کم کار بارے بڑی فکر ہوندی اے۔ ایس ورھے اوہناں اردو وچ ایم فل دی ڈگری وی حاصل کر لئی اے، پر ایس توں پہلے اوہ بہت سارے دوستاں دی ایم فل تے پی ایچ ـڈی سطح دے مقالیاں واسطے بڑے قیمتی مشورے تے مواد دی فراہمی دا سربندھ وی کردا رہیا اے۔
ایہ عثمان پھلروان دے اوہناں انٹرویو دا انتخاب اے جیہڑے ہفتہ وار پنجابی چانن وچ اگڑ پچھڑ چھپدے رے۔ میرے خیال وچ انٹرویو توں ودھ کے کسے لکھاری نوں جانن تے پہچانن واسطے ہور کوئی ہیمانہ بہتر نہیں ۔ ایس پاروں اچیچی گل حقیقی طور تے اچیچی گل دا درجہ حاصل کر چکی اے۔ ایہ سارے انٹرویو پنجاب دے وکھ وکھ علاقیاں وچ موجود لکھاریاں کولوں خصوصی طور لئۓ گئے نیں ۔ ایس منفرد کاوش تے میں عثمان پھلروان نوں مبارک باد پیش ہردا ہاں جنھاں لکھاریاں دا اک اچیچا گلدستہ ساڈے ساویں لیا رکھیا اے۔
ڈاکٹر محمد ریاض شاہد
Δεν υπάρχουν σχόλια:
Δημοσίευση σχολίου